آزاد کی فر آزاد کرو
ہک عرض کراں جے تساں سن لو تے
ساڑھی آزادی نا پہار کیاں چایا سی
کیاں بنڈیاں پستولاں جواناں وچ
مروایا پراہواں تے شیر جواناں کی
کدوں تھوں سننے آئے آں
چار جنگاں کشمیر اپر لڑیاں
احساناں نی پنڈ مونڈھے اپر سٹی
آزادی نا خواب تکایا نے
تس ساڑھے پیارے پہائ جان او
تساں کی پہائ جان کس بنایا سی
انڈیا اساں کی کھائ جاسی
ہر پل بڑا ڈرایا نے
تساں شہ رگ شہہ رگ کھیڈنے رہے
انھاں اٹوٹ انگ اخوایا اے
اساں کس کی سچا اخاں ہن
اس کری تے جو دکھایا اے
تساں چپ چپیتے کیاں ھوئ گئےھو
پہائ جی کجھ تہ فرماؤ
جے پتہ چلی گیا ہن تساں کی
کہ پچھلیاں گلاں خام خیالی سن
تے ہن وی ویلہ اجے بیتیا نہیں
تساں بئوں نہیں تہ ہک کم کرو
کجھ کرم کرو نکے پہائ پر
اسکی انسان ہن سمجھی کہینو
اسنا وی اک اپنا کہار ھوئے
جتھے اپنا نظام چلائ کہینے
فیر اپنے دوئے جسے کی
دنیا کی باور کران استے
اک تحریک چلائ کہینے
جتھے تس وی اسنی تائید کرو
سب ملکاں نے ایواناں وچ
کشمیر نی رل مل گل کرو
اے کہہ آدھا گھنٹا ہفتے وچ
کشمیر نا سوگ منانے او
ساڑھے خواباں کی دفنانے او
کجھ کم کرو کجھ کرم کرو
یا اینج کرو جے کری سکو
جے نکا ہتھوں نکل گیا
تساں ابا جی توں پچھی کے
نکے کی ہن عاق کرو۔
آزاد کرو آزاد کرو
آزاد کی فر آزاد کرو
توقیر لون
No comments:
Post a Comment